مستنياك من مجموعة بغير آخر حاجة بقلم : ضياء عزت

 

مستياك زي كل ليلة.. أعدة وحيدة بين أربع حيطان.

وعلى نار الانتظار أعدة..

خلاص حـ اتجنن م الوِحدة.

ومش قادرة أكمِّل..

ولا اصبر ولا اتصبَّر ولا أتحمِّل..

 يئستْ ترجع زي الأوِل..،

زهقتْ من كُتر المناهدة.

وإنت ما بين الكدبة والكدبة.. ميت كدبة.

كل ما اقفل باب.. تفتح ألف للغربة.

ماعدليش حبايب ولا صُحبة..،

ولا منك لاقية مودة.

دايما عني مشغول وناسى..، 

ولا همّك إحساسي..

بقيت بكلِّم الستاير والكراسى..،

وبتحضن دموعي المخدة.

 تعبت اشيل جوه قلبي..،

واسكت واخبي..

تعبت اشكي روحي لروحي..

وتبكي روحي من جروحي..،

و إنت توعدني ببكرة، وييجي بكرة..، تقوللي بكرة..،

 وبرضُه ماعندكش فكرة..

باللي جوايا..،

 خلاص كدة كفاية..

مفيش فايدة.

 وكأنك بعذابي ده فرحان..،

وكأنك سعيد إني اسيرة، وإن انت.. سجَّان!