عمرو مصطفي يتهم فيلم أسماء بالماسونية

 

من شوية كتب عمرو مصطفي علي صفحته الرسمية سؤال للجماهير وهو " فى جملة مش عجبانى فى فيلم هند صبرى وماجد الكدوانى الجديد....اولا اسمه: أسماء...فيلم عشوائيات وايدز وكده...ما علينا بس البرومو بتاعه بيخلص على جملة: " ح يشوفوا مصر وهى بتولع تانى.".......صدفة دى؟؟؟ وللا ايه؟؟ "

واتهم عمرو الفيلم اتهامات ماسونية خارقة .. حيث إنه اتهم فيلم " أسماء " بإن فيلمه أسماء !!! وطبعاً زي ما أحنا عارفيين في أول صفحة من كتاب الماسونية إن أسماء هي رمز أول خطوة لأي ثورة بتحصل في العالم، وتاني حاجة إن الفيلم بيتكلم عن العشوائيات والإيذر .. وده طبعاً رمز صريح للماسونية لإن مفيش حاجة اسمها إيدز وإن دي كلها ألعاب ماسونين، تالت حاجة إن برومو الفيلم بيخلص علي "  ح يشوفوا مصر وهى بتولع تانى " ودي بقي الخلاصة حيث إن عمرو سلامة مخرج ومؤلف الفيلم وهو صديق لوائل غنيم وفي ناس شافته مع البرادعي وطبعاً عمرو مصطفي عارف إن البرادعي وغنيم من رموز الماسونية في الكون كله لدرجة إنهم بيدوا دروس خاصة في الماسونية بعد الضهر ، بس ياخسارة نسي عمرو إن بطلة الفيلم هي هند صبري اللي هي تونسية الجنسية وتونس اول دولة حصل فيها ثورة والثورة دي ماسونية اساساً.. بس اللي ميعرفهوش عمرو مصطفي إن فيلم اسماء اتعمل قبل الثورة واتكتب قبل الثورة .. الظاهر إن الفوتوشوب أثر أوي علي عمرو مصطفي.