شاطر يا باشا ضياء عزت

 

شاطر يا باشا جت في عينه

صاب نشانك ميـّة ميـّة.. يسلم دراعك

يللا التانية في نص جبينه

خلص  يا باشا ع البلطجية.. بلمسة صباعك

نضـّف بلدنا من أعداء البلاد

كلاب، رمم، اوغاد

دوس يا باشا ع الزناد

مات ؟

شاطر يا باشا

تسلم يا باشا

ثانية ارميه في الزبالة  مخليش له اثر ولا علامات

شاطر يا باشا

راجل يا باشا

هو صحيح كان اعزل بس كان لازم يموت

كان صوته عالي

ازاي للي زيه يطلعله صوت

ده خاين من الخونة  اللي بيعملو ازمات

ده كافر من الكفار اللي بيشتمو الحكومات

شاطر يا باشا

جدع يا باشا

روَّح وانت مرتاح الضمير

غمض عنيك متهني ونام فى السرير

انت النهاردة تعبت كتير

 يخرب بيت الاعتصامات

ربنا يخليلنا جنابك.. ويخليك لمصر

ويحرس تمللي شبابك.. ويكتبلك النصر

على أي خسيس واطى

ادامك مش بيطاطي

بس لو ممكن سؤال يا باشا

همه ليه بيكرهو بدلتك الزباطي ؟