شبه ميت: بقلم سومه سعيد

مش عارفه ليه امبارح بالذات افتكرتك!

وافتكرت حاجات كتيرة كانت زمان بينا

افتكرت كل كلامك وكل غنوة

جمعتنا ف يوم من الايام

دخلت اوضتى دورت ف كل ركن فيها

على اى ذكرة منك

هناك كنت قاعدة بكلمك وانت معايا على الفون

كنت يومها عماله احكيلك عن تفاصيل يومى

ومشاكلى الصغيرة اللى عرفت اد ايه انها صغيرة

من يوم ماعشت اكبر مشكله ف حياتى وهى ....فراقك

دورت على صورك كنت بدعى وانا بدور الاقيلك

صورة عشان كان نفسى اشوفك اووووووووى

الغريبه ان كل صورك اللى من غضبى قطعتها

لاقتها موجودة..استغربت وقولت ازاى؟؟؟

كنت خلاص قربت اتجن..بس افتكرت

انت عارف اد ايه انا بنسى بس ماتخافش مش بنساك انت

ليه معرفش؟ يارتنى اعرف انساك زى مابنسى كل حاجة كدة

بس انت الحاجة الوحيدة اللى مابنسهاش

افتكرت انى كنت كل ما باخد منك صورة

كنت بطلع عليها نسخ كتيييييييير اوى كل اصحابى وانت

كانوا بيقوله عليا مجنونة وكانوا مستغربين ليه بعمل كدة

وليه مش بخليهم كلهم ف مكان واحد

انت ف مرة سألتنى يومها فضلت اضحك واتوة لحد ما نسيت انت الحوار

ولسه لحد دلوقتى متعرفش ليه كنت بعمل كدة؟

دلوقتى وانت مش معايا انا بكتبلك وبقولك ليه عملت كدة

انا كنت طول الوقت عارفه ومتأكدة انك هتبعد عنى ومش هتبقا ليا

كنت حاسه ان الزمن هيختارنا من بين كل الناس عشان يفارقنا

يمكن عشان يختبر حبنا لبعض..و يمكن عشان احنا مكناش اصلا لبعض..!!

فكنت كل صورة ليك بطلع عليها يجى ميت نسخة كدة وكل صورة احطها

ف مكان غير الصورة التانيه

شايفه ف عنيك فضول بتقولى ليه بردوة ماعرفتش؟

اصبر بس عليا هقولك اهو انت كدة مش هتتغير دايما مستعجل

هقولك اهو يا حبيبي..بعد اذنك ممكن اناديلك بيها زى زمان؟

ولو لاخرة مرة معلش استحملنى....

انت عارف طبعا انى عصبيه اوووووى ووقت مابزعل بكسر كل حاجة

وانت كنت بتعصبنى كتير ومن كتر غضبى كنت الاقى صورتك قدامى اقطعها ولما اقطعها كنت بفوء وافضل اعيط اوووووووى واقول عملت كدة ليه بس؟ واتصل بيك اعتزرلك وكل مرة كنت تقولى انا اللى مزعلك بتتأسفيلى ليه مكنتش بجاوبك..........ادينى اهو جاوبتك على سؤالين كانوا محيرينك ههههههه

كنت فاكرة يوم ماقولتلى كل واحد فينا ف طريق احنا خلاص هنفترق

النهايه جت انى قطعت كل صورك كنت بموت وانا بقطع اخر صورة دى

بس غصب عنى بئه ماانت مابقتش من حقى... بس اسفه لاقيت صورة ليك

لسه فاضله ومش قادرة اقطعها برغم غضبى

حزنى....

المى....

جرحى...

برغم ظلمك

وقساوتك

وغدرك

لسه فاضل صورة ليك ماتقطعتش

لسه فاضل ليك ذكريات ماتنستش

لسه سامعه كلامك حكاياتك

لسه فاكرة ردود افعالك

لسه فاضل انا بس بملامحك انت

بقلبك انت بعقلك انت بكل حاجة فيك

اللى فاضل هو انت واللى فاضل فيا

هو حد مكسور ...شبه ميـــــــــــــــــــــت