تراب الماس شفرة أحمد حلمي للوصول للعالمية

زي باقي الجمهور، سمع أحمد حلمي عن رواية " تراب الماس" اللي حققت نجاح كبير لما نزلت  في المكتبات، واتباعت كل النسخ وقت نزولها المكتبة, في الوقت ده  كان بيدور حلمي عن عمل سياسي مختلف يغير فيه من جلده الفني، ويضيف بيه لمشواره السينمائي, وقرر حلمي انه يشتري الرواية.
حصل كده مع  حلمي السنة اللي فاتت لما كان مشغول بتحضير فيلم "عسل إسود"، لكن حلمي دايماً بيحب يرسم خريطة قدامة لمستقبلة والجديد اللي بيقدمة وعشان كده اشتراها عشان يقدمها في فيلم خصوصاً ان الرواية كانت بتتكلم  عن مدي انتشار الفساد وتوحش رجال الأعمال في عهد مبارك، بشكل كان مستحيل أنها تتحول لعمل سينمائي من غير متتشوه بمقص الرقيب.
انتهي "أحمد مراد" من كام يوم من كتابة سيناريو الفيلم , وقال :" إحنا كتبنا سيناريو فعلا، وفي انتظار الحالة المرضية للسينما إنها تتعافي، لأن (تراب الماس) محتاج حجم إنتاج كبير، وأنا مُصّر إنها تطلع في أفضل شكل ممكن .. يعني يا تتعمل صح يا ماتتعملش" وا ترشح مروان حامد للإخراج.
وبتدور أحداث الرواية حوالين "طه الزهار" مندوب مبيعات الأدوية وجسمه ضعيف و بيستخدم ذكاءه وعبقريته في استكمال دايرة الانتقام اللي بدأها والده وبيواصل عمليات قتل الفاسدين اللي خربوا المجتمع ومنجحش القانون انه يوقفهم عند حدهم او يقبض عليهم، واستخدم سم "تراب الماس" اللي بيقتل اللي بياكله بعد 3 شهور من غير ما حد يكتشف  أنه مات .